Тәжірибесіз жастар жұмыссыз жүр

Қазіргі уақытта жұмыссыздық дерті тек қазақ қоғамын ғана емес, әлем елдерін де алаңдатып отыр. Қазақстанда жұмыссыздық мәселесі жастарды айналып өтпейтіні анық. Қазақстан Республикасы Ұлттық экономика министрлігі Статистика комитетінің  деректеріне сүйенсек,елімізде жұмыссыз жүрген адамдардың саны 442,3 мыңға жеткен. Бүгінгі таңда жұмыссыздық деңгейі 4,9% құрап отыр. 2016 жылмен салыстырғанда жұмыссыздық деңгейі 0,1%-ға төмендеген. Ал  Астана қаласының Статистика департаментінің деректері бойынша2017 Астана қаласы бойынша еңбек нарығындағы жағдайға сай жастар арасындағы (15-28 жас)  елордадағы жұмыссыздық деңгейі 4,6% болса, 2016 жылы бұл көрсеткіш 4,4% құраған.

Жастардың жұмысқа таба алмауының өз себептері де аз емес. Біріншіден, жоғары оқу орнын аяқтап, еңбек нарығына қадам басқан жас маман мен жұмыс беруші арасындағы туындайтын мәселелердің бірі – еңбек өтілінің жоқтығы. Екінші мәселе – университетке грантқа кездейсоқ түсіп, мамандығына деген қызығушылығының болмауы. Үшінші – жалақының аздығы. Осы сынды мәселелер тізбектеліп кете береді. Күн көріс қамын ойлаған жастар мамандық бойынша жұмыс іздеп, істегеннен гөрі, мүлдем басқа салаға кететіні де жасырын емес.

Астана қаласы Жұмыспен қамту орталығының директоры Олжас Омардың айтуынша, Жастар тәжірибесі – жастарға арнал зор мүмкіндік екенін екенін атап өтті. Биылғы жылы іске қосылған enbek.kz сайты арқылы да жастар өз мамандығы бойынша бос жұмыс орындарын көре алады.

Астана қаласы Жұмыспен қамту орталығының мәліметтеріне сүйенсек, электрондық еңбек биржасында 31 000  астам бос орындар хабарландыруы, 83 000 түйіндеме орналасқан. Астана қаласының жұмыспен қамту орталығының мәліметтері бойынша елордада 3000-ға жуық адам жұмыс іздеуде. Еңбек биржасы 38 жеке меншіктегі жұмыс беруші агенттіктер, жұмыс іздеу бойынша 5 интернет-сайт, 31 000 –ға жуық жұмыс берушілердің басын біріктіріп отыр.