Жүкті әйелге не істеуге болмайды?

Қазақ ертеден салт-дәстүрді берік ұстанған. Адам өмірінің әртүрлі жағдайларына байланысты орындалатын дәстүрлер аз емес. Олардың ішінде аяғы ауыр келінге жасалатын түрлі ырым-тыйымдар мен дәстүрлер де бар. 

Жүктілік кезде жасауға болмайтын нәрселерге тоқтала кетейік:

- Тіл-көзден сақтану үшін іш көріне бастағанға дейін күйеуінен басқа ешкімге жүктілік жөнінде тіс жармау керек. 

- Жүкті әйел қоян етін жесе, бала қоянжырық боп туылады.

- Түйенің етін жесе, түйе секілді жүктілігі 12 айға созылуы мүмкін. Бұндай жағдайда түйеден аттатып немесе астынан өткізген.

- Түнде жалғыз далаға шығуға болмайды.

- Аяғы ауыр әйел түнде суға бармайды.

- Бала туылмай жатып алдын-ала киімдерін, заттарын дайындауға болмайды.

- Жүкті әйел шашын кессе - іштегі бала кемтар болып туады, бақыты кесіледі.

- Әйел адам тоқымамен айналысса, баланың кіндігі оралып қалады.

- Жаңа түскен келін киім-кешегін қысқартса – нәрестесі кем туады немесе түсік тастайды.

- Түсік тастамасын деп, жас әйелдің көйлегінің етегін бүріп қояды.

- Толғағы қатты болады деп екіқабат келіншекке толарсақ жегізбейді.

- Мерзімінен бұрын босанады деп пышақ, ара, қайшы ұстатпайды.

- Бала кіндігіне оралып қалады деп, ине-жіп ұстатпайды.

Бүгінде осы аталған ырым-тыйымды ескі дәстүр деп ұстанбайтын адамдар да бар. Негізінде оны ұстанып-ұстанбау әркімнің өз еркінде. 

                                                      Авторы: Бану Әбдіғалиева