Жоғалғандар әлі табылған жоқ: тасқын тағы бір адамды ағызып кетті

Абай облысы Үржар ауданында 23 жастағы азаматты тасқын ағызып кетті. Осылайша суға кеткендер саны төрт адамға жетті. Құтқарушылар Аягөз ауданында ағып кеткен үш адамды да бір аптадан бері таба алмады. Бұл туралы Bugin.kz тілшісі КТК арнасына сілтеме жасап хабарлайды.

Суға кеткен малшы мен екі тракторшыны іздеуге иісшіл иттер мен Жетісудан келген құтқарушылар жұмылдырылды. Ал Үржар ауданындағы тасыған өзенге ағып кеткен азаматтың өз-өзіне қол жұмсауы мүмкін деген болжам бар. Мамандардың айтуынша, ол денсаулығына байланысты медициналық есепте тұрған екен. Енді суға кеткен төрт адамды 80 жуық құтқарушы іздестіріп жатыр.

Өңірдегі екі елдімекеннің күре жолын қызыл су шайып, қатынас үзілген. Мамандар Бозай, Кіндікті ауылының тұрғындарына керек-жарақты тікұшақ және қайықпен тасымалдауға мәжбүр. Енді құтқарушылар Көкпекті, Бородулиха ауданын тәуілік бойы бақылауға алды. Өйткені қардың көбесі сөгіліп, өзендерде су деңгейі көтерілген.

Абай облысы ТЖД бастығының орынбасары Азамат Орымбаев:

 "Қазір бар күш-құрал Көкпекті ауданына жұмылдырылған. 200-ден астам жеке құрам, 28 техника сол жерде жұмыс істеп жатыр",-деп айтты.