Түрмедегі Марат Жыланбаевтың жағдайы ауыр

Степногорск қаласындағы абақтыда 7 жылдық жазасын өтеп жатқан марафоншы Марат Жыланбаевтың жүрек соғысы күрт төмендеген, деп хабарлайды Bugin.kz порталы Азаттыққа сілтеме жасап. 

Бұл турлы 11 желтоқсанда оның қызы Азия Жыланбаева хабарлады. Оның сөзінше, Марат Жыланбаев қыздарының біріне қоңырау шалып, жағдайы нашарлап тұрғанын, жүрек соғысы минутына 42 болғанын айтқан.

“Әкемнің аштық жариялағанына бүгін отызыншы күн. Ол тек су ішеді. Яғни, ол қайнамаған суық су ішуге мәжбүр. Әкем кінәсіз болғандықтан да күресін тоқтатпайды. Мен әділдік талап етемін. Оның түрмедегі тамақ туралы, басқа да талаптарының бәрі – заңды талаптар”, – деді Азия Жыланбаева.

 

Түрмеде отырған Марат Жыланбаев өзіне қатысты шыққан үкімге наразылық ретінде 13 қарашада аштық жариялаған еді. 

Оппозияциялық белсенді Степногорск түрмесіндегі санитарлық жағдайдың нашарлығын, тамақтың дұрыс берілмейтінін, адвокаты мен достарына қоңырау шалуға тыйым салынғанын жиі айтып, шағымданып келеді. Ол өмірі үшін қауіп төніп тұрғанын да мәлімдеген. 
 

Еске салайық, бұған дейін Жоғарғы сот жеті жылға сотталған марафоншы, оппозициялық белсенді Марат Жыланбаевтың кассациялық арызын қараудан бас тартқанын хабарлаған едік.