Түйе өсіретін Түркістан облысының тұрғыны мол табысқа кенеліп отыр

Еңбек адамдарының қашанда еңсесі биік. Әсіресе, Түркістан облысында кәсіп бастап, көл көсір пайда тауып отырған жастар көп. Бірі нәпақасын жен анадан тапса, енді бірі мал шаруашылығын өркендетіп келеді. Солардың бірі Созақ ауылының тумасы Нұрбол Бейсүгіров, деп хабарлайды Bugin.kz порталы kazinform.kz-ке сілтеме жасап. 

Нұрбол түйе шаруашылығымен айналысады. Көпшілікке таңсық кәсіпті қолға алғанына да көп бола қойған жоқ. 2004 жылы «Нұрбол» шаруа қожалығын құрып, түйе сатып ала бастады. Тіпті, кейбірін ел аумағынан, алыс жақын шетелдерден де алдырды.

«Шаруашылықтың ішіндегі тиімді бағыттарының бірі түйе түлігін асырау. Ол күтімді көп қажет етпейді. Сондықтан басқа ауыл шаруашылық малдарымен салыстырғанда тиімді. Сонымен қатар, түйе еті мен сүті күнделікті сұранысқа ие өнімдер. Бұл кәсіппен ең алғаш атамыз айналысты. Содан бері мен жалғастыруып келемін», - дейді шаруа.

Қазір Нұрболдың шаруа қожалығында 500-ге жуық түйе бар. Олардың 100-ден астамы бір өркешті түйелер. Ал қалғаны «Вactriаnus» тұқымдасқа жатады.

«2009 жылы айыр өркешті «Вactriаnus» түйесін дамыту бойынша мемлекет тарапынан субсидия алдық. Қазір түйе санын 500-ге жеткіздік, қосымша 100-ден астам жылқымыз бар. Алдағы уақытта республика бойынша іске асырылып жатқан «Ауыл аманаты» пилоттық жобасы аясында жылдық мөлшерлемесі 2,5 пайызды құрайтын жеңілдетілген несиеге қол жеткізіп, кәсіпті кеңейтуді жоспарлап отырмыз. Қазірдің өзінде қымыран өндірумен ғана шектелмей, ет өнімдерімен де айналысып жатырмыз» - дейді шаруа.

Созақ ауылында түйе етінің бір келісі 1700 теңгеден сатылады. Ал, «ақшасын жалақы алғанда береміз» деп келісетіндер үшін баға 1900 теңге. Ауылда қысқы соғым үшін бір түйені сатып алатын адамдар да бар. Шаруа олармен түйенің келісіне қарап, бағасын шығарады. Түйе сүті де азын аулақ табыс алып келіп, шаруаның шағын шығындарын жауып отыр.

«Анашым үйде қымыран дайындайды. Жұбайым түйе сауады. Жасұлан есімді ағам екеуміздің де жақсы қызметіміз болды. Бірақ шаруа қожалықтың жұмысын жүргізу үшін барлығын тастадық. Содан таңертең ертемен іске кірісеміз. Түн батқанға дейін, сол шаруашылықтың жұмысын атқарамыз. Қазір 30-ға жуық түйені сауып отырмыз. Қымыранды ауыл тұрғындары алып ішеді. Арасында қаладан арнайы келіп алып кететіндер де бар» - дейді ол.

Шаруа қожалықта 8 адам жұмыспен қамтылған. Мұндағы жұмысшыларға қажетті бар жағдай жасалған. Ең бастысы барлығында баспана бар. Шаруаға қажетті техникаларда аулада тұр.

«Шаруа қожалықтың аумағында 156,69 гектар жеріміз бар. Оның 150 гектары жайылымдық болса, 3,19 гектары шабындық, 3,5 гектары суармалы. Алдағы уаытта да соны игеру ісін жоспарлап отырмыз. Мүмкіндік болса, мал мен егін шаруашылығын қатар дамытсақ деген жоспарымыз бар» - дейді ол.

Нұрбол табыстың табанды еңбекпен келетінін жақсы біледі. Сондықтан көп еңбектенеді. Ізденеді. Шаруашылық жұмысын жүргізу бағытындағы кітаптарды көп оқиды. Күннің ыстық-суығына қарамай көшеде жүріп, түйелердің жем-шөбін дайындайды. Боталарынан ажыратып, бабын келтіреді.

«Еңбекпен келген ақшаның берекесі бар. Бұл тәмсілді мен шаруа қожалықтың жұмысшыларына үнемі айтып отырамын. Соңғы кезде елімізде еңбек адамдарына үлкен жағдайлар жасалып жатыр. Оны да үнемі хабардар етіп, еңбек ерлерінің жұмысын үлгі етемін. Сондықтан бізде де нағыз еңбек адамдарының династиясы қалыптасып келеді» - дейді Нұрбол Бейсүгіров.