Ақтөбеде үш адамның кепілге алынуы: тың деректер шықты

Ақтөбеде үш адамның кепілге алыну оқиғасына қатысты қылмыстық кодекстің екі бабы бойынша іс қозғалды, деп хабарлайды Bugin.kz порталы.

Бұл туралы облыстық полиция департаменті мәлімдеді. "Адам өлтіру" және "Адамды кепілге алу" баптары бойынша қылмыстық іс қозғалды. 

Еске сала кетсек, 13 қаңтардан 14-іне қараған түні әлеуметтік желіде белгісіз біреу Ақтөбедегі үйлердің біріне кіріп, бойжеткенді кепілге алғаны туралы ақпарат пайда болды. Кейін полиция өкілдері бұл ақпаратты растап, 13 қаңтарда кешкі сағат 20:00 шамасында жедел басқару орталығына адамдарды кепілге алу фактісі бойынша хабарлама түскенін мәлімдеді. Оқиға орнына жедел тергеу тобы, арнайы жасақ қызметкерлері, барлық шұғыл қызмет жедел жұмылдырылған. 

Кейін полиция арнайы іс-қимыл арқылы күдіктіні ұстады. Жәбірленушілер ауруханаға жеткізілді. Алайда егде жастағы ерлі-зайыпты алған пышақ жарақатынан көз жұмды. 40 жастағы әйелдің жағдайы орташа. Үш адамды кепілде ұстаған ер адам әйелдің бұрынғы жігіті болып шықты.