Қазадан хабарсыз: Ақтөбеде кепілге алынған әйелдің жағдайы белгілі болды

Ақтөбеде ер адам кепілге алып, қинаған 40 жастағы әйел есін жиды, деп хабарлайды Bugin.kz порталы. 

Еске салайық, 13 қаңтар күні белгісіз ер адам әйелдің үйіне кіріп, оны кепілге алған. Ал әйелдің ата-анасын ұрып-соғып жертөлеге қамаған. Кейін полиция ер адамды ұстады. Жәбірленушілер ауруханаға жеткізілді. Алайда 40 жастағы әйелдің ата-анасы алған пышақ жарақатынан көз жұмды. Мәліметтерге сүйенсек, ер адам 40 жастағы әйелдің бұрынғы жігіті болып шықты. 

Дәрігерлер аман қалған әйелдің жағдайы орташа екенін айтты. Әйелді полиция күзетіп отыр. Ол ата-анасының қазасын әлі білмейді. 

“Науқас нейрохирургия бөлімінде палатада жатыр. Әйел көптеген жарақат алған және қатты күйзеліске түскен. Онымен күн сайын психологтар жұмыс істеп жатыр. Ол ата-анасы мен сол күнгі оқиғалар туралы сұрайды, бірақ көп нәрсе айтпаймыз. Тек оған емделу керек екенін, әзірге тұруға және жүруге болмайтынын айтамыз”, – деді облыстық көпбейінді аурухананың нейрохирургия бөлімінің меңгерушісі Мақсат Оразжанов.

Әйелге ұялы телефон берілмеген. Сондықтан ол жақындарының қайтыс болғанын әзірге білмейді.

Ертең, 16 қаңтарда 67 жастағы әйел мен 74 жастағы ер адам жерленеді. Отбасының туыстары болған жағдайға түсініктеме бермеді.