Ақтаудағы ұшақ апаты: Көлік министрлігі тың мәлімдеме жасады

Ақтауда ұшақ құлаған жерден сынама алынды, деп хабарлайды Bugin.kz порталы. 

Ведомствоаралық жедел тергеу тобы Әзербайжан ұшағының Ақтау маңында апатқа ұшырауына қатысты сотқа дейінгі тергеу амалдарын жүргізіп жатыр. 

Соған байланысты  ұшақтың құлаған жерінде қоршаған ортаның ластануын анықтау үшін облыстық экология департаментінің мамандары топырақтан сынама алды. 

Тергеуді барысын Әзербайжан мен Қазақстанның құзырлы органдары өзара іс-қимыл арқылы жасап жатыр. Ал Мемлекетаралық авиация комитетінің мамандары Бразилияның авиациялық оқиғаларды тергеу және алдын алу орталығына (SENIPA) түскен қара жәшіктің мәліметтерін зерттеп жатқаны атап өтілді. 

“Грозный, Махачкала және Минеральные Воды диспетчерлері мен әуе кемесі командирінің арасындағы әңгімелерге талдау жүргізіліп жатыр. Техникалық-авиациялық сараптама тағайындалды. Ұшақтың барлық жүйесінің жай-күйі, сондай-ақ заттай дәлелдемелер зерттеліп жатыр. Диспетчер қызметі, әуе қозғалысын басқару жүйесі және әуе шабуылына қарсы қорғаныс органдары лауазымды тұлғаларының әрекетін бағалау үшін кешенді ұйымдастыру-техникалық сот сараптамасы комиссиясы тағайындалды", - деп хабарлады Көлік министрлігі. 

Тергеу комитетіндегілер тергеу қайғылы жағдайдың барлық ықтимал себептерін зерттеп жатқанын айтқан. 

"Қазақстанның Көлік министрлігіне қарасты авиациялық оқиғаның себебін анықтау жөніндегі арнайы комиссиясының жұмысы жалғасып жатыр. Алдын ала есеп жарияланғанға дейін комиссия ресми дереккөзі жоқ ғаламторда жарияланған дерекке түсініктеме бермейді. Естеріңізге сала кетейік, комиссия ҚР заңнамасының талаптарына және ИКАО-ның 13-қосымшасының талаптарына сәйкес алдын ала есеп жариялайды. Онда тергеу барысы және тергеу нәтижесінде анықталған нақты ақпарат болады", - делінген хабарламада. 

Еске салайық, 25 желтоқсан күні Бакуден Грозныйға бет алған Әзербайжан ұшағы Ақтау маңында апатқа ұшырап, бортта болған 67 адамның 39-ы қаза тапты. 28 жолаушы аман қалды. Бұған дейін ұшқыштар мен диспетчерлердің соңғы әңгімесі тарағанын хабарлаған едік.