Сенбіге дейін қол қоймайды: ХАМАС пен Израиль келісімге қайта келді

ХАМАС пен Израиль атысты тоқтату туралы қайта келісімге келді. Бірақ Израиль үкіметі бұл келісімді сенбіге дейін бекітпейді, деп хабарлайды Bugin.kz порталы. 

Бұл ақпаратты Израиль премьер-министрінің кеңсесі растады. Дохадағы келіссөздер барысында делегациялардың бітім туралы келісімге қол қойғаны ресми түрде белгілі болды. 

АҚШ пен Қатар өкілдері де Газа секторындағы атысты тоқтату және кепілге алынған Израиль азаматтарын босату туралы келісімге қол қойған.

Times of Israel және Jerusalem Post газеттерінің хабарлауынша, Израиль премьер-министрі жұма күні әскери кабинет жинап, келісімге дауыс береді. Бірақ ХАМАС-пен жасалған келісімді үкіметтің толық құрамы бекітуі керек. Ал толық құрам сенбі кешке жиналады екен.

Еске салайық, 15 қаңтардан 16 қаңтарға қараған түні Израиль мен ХАМАС атысты тоқтатып, екі тарап кепілде отырғандарды босатуыға келіскен болатын. Алайда бір күн өтпей Израиль өз ойларынан айнып қалған. Келісімнің нақты шарттары мен мерзімдері жария етілмеген еді. Бірақ басты мақсат – халықтың зардап шегуін тоқтату және гуманитарлық жағдайды тұрақтандыру болатын.