Маңғыстау облысында көз жұмған сарбаз: кімге қандай жаза тағайындалды?

Қазақстанның құрлық әскерлерінің Бас қолбасшысы генерал-майор Мереке Көшекбаев 2024 жылдың 7 қыркүйегінде Маңғыстау облысында қаза тапқан мерзімді қызметтегі сарбаз Марат Барқұловтың өліміне қатысты тергеу барысы қалай жүретінін айтты, деп хабарлайды Bugin.kz порталы. 

Оның айтуынша, Астананың әскери сотында взвод командирі лейтенант Досовқа қатысты қылмыстық іс  қаралып жатыр.

Марқұм Марат Барқұловтың қазасынан кейін “Батыс” өңірлік қолбасшылығы әскерлерін басқарушы генерал-майор Бауыржан Артықов жауапқа тартылып, әуе қорғанысы әскерлерінің бастығы полковник Садиков қызметінен босатылған. Тағы үш офицер қызметтік міндеттерін толық орындамағаны үшін ескерту алып, ал төртеуі тәртіптік жаза алған. 

Еске салайық, Марат Барқұлов өткен жылы 7 қыркүйекте мерт болды. Қайғылы жағдай "Батыс" өңірлік қолбасшылығы бөлімшелерінің Маңғыстау облысы "Оймаша" полигонында өткен оқу-жаттығу жиынында болған. Ақтау гарнизоны баспасөз қызметіне сілтеген жергілікті басылымдардың хабарлауынша, "қаруды қолдану ережесін бұзу салдарынан" қатардағы жауынгер көз жұмған. 

Бұған дейін, марқұм сарбаздың әкесін судья сот залынан қуып шыққанын хабарлаған едік.