Алапат өрттен бір отбасының 14 адамы көз жұмды

Түркиядағы қонақ үйде болған өрттен бір отбасының 14 адамы ажал құшты, деп хабарлайды Bugin.kz порталы. 

Түркия президенті Режеп Тайип Ердоған жұбайымен бірге Болу провинциясында орналасқан Карталкая тау шаңғысы орталығында болған өрт салдарынан қаза тапқандардың жаназасына қатысты. Бір отбасының 14 адамын бірдей жерлеу рәсімінде Ердоған көз жасын жасыра алмады. 

14 адам бірдей бақилық болған Гюлтекиндер әулеті екен. Зехра Сена Гюльтекин – Turkish Airlines компаниясының сату бөлімінде қызмет еткен. Ол күйеуі, үш баласы және тоғыз туысымен курортқа демалуға келген. Олар қысқы каникул кезінде демалыс уақытын өткізуге келген. Зехра өрт шыққан кезде анасына хабарласып, кешірім сұрап үлгерген.

Ердоған көз жұмғандардың туыстарына және түрік халқына көңіл айтты.

“Президент Ердоған 14 мүшесінен бірдей айырылған Гюлтекиндер әулетінің жаназасында көз жасын тоқтата алмады", - деп жазады жергілікті басылым. 

Естеріңізге сала кетсек, 21 қаңтарда түнде Түркияның Карталкая тау шаңғысы курортында орналасқан Grand Kartal қонақ үйінде өрт шығып, 76 адам көз жұмған еді. Күдікті ретінде 9 адам ұсталды.

Президент Қ. Тоқаев Режеп Тайип Ердоғанға көңіл айту жеделхатын жолдады.