“5 минут жеткілікті": Экология министрі өз көлігін қыздырып көрсетті (ВИДЕО)

Экология министрі Ерлан Нысанбаев өз көлігімен эксперимент жасап көрсетті. Ол көлік қыздыруға 5 минут жететінін дәлелдегісі келді, деп хабарлайды Bugin.kz порталы.

Видеоны мына сілтемеден көресіз.

Экология министрі бұған дейін солтүстік аймақтарда көлікті жылытуға бес минут жеткілікті екенін, дәлелдеу үшін өз көлігімен эксперимент өткізіп көретінін айтқан еді. 

Министр уәдесінде тұрып, өз көлігін қыздыру сәтінен видео жариялады. Видеодан Нысанбаев көлігін оталдырып, секундомер қосып қойғанын көруге болады. Министр даладағы ауа температурасы -17 градус екенін айтты.

Бес минут өткен соң, министр көлігінің жеткілікті деңгейде қызғанын айтып, қозғала бастайды. Алайда көлік қозғалтқышының температурсы қаншалықты көтерілгенін көрсетпейді. 

Еске салайық, Петропавл тұрғыны көлігін 5 минуттан артық қыздырғаны үшін айыппұл арқалағандардың алғашқысы болды. 

Тұрғынды полицияға көршісі ұстап берді.