Семейде шыршадан құлаған мұғалім: қала әкімнің орынбасары күдікке ілінді

Семейде қалалық шыршаны безендіру кезінде биіктен құлап, жарақат алған мұғалімнің ісі бойынша қала әкімінің орынбасары Арайбек Хамзаев күдікті деп танылды, деп хабарлайды Bugin.kz порталы. 

Алдын ала мәлімет бойынша, әкім орынбасарына қатысты тергеу өткен жылдың 27 желтоқсанында басталған. Тергеудің негізгі себебі – Хамзаев мұғалімдерді қызметтік міндеттеріне қатысы жоқ жұмысқа тартқан. 

Тергеу "ауыр зардаптарға әкеп соққан билікті немесе лауазымдық өкілеттіктерді асыра пайдалану" бабы бойынша жүргізіліп жатыр. 

Еске салайық, жаңа жыл мерекесі қарсаңында шырша безендіруге заңсыз тартылған мұғалімдердің бірі биіктен құлап, зардап шеккен еді. Ал мұғалімнің әйелі күйеуінің мүддесін қорғап, жұмысқа заңсыз шақырылғанын, жұмысы үшін ешқандай ақы алмағананын айтқан еді.

Абай облысының білім басқармасы бұл дерекке қатысты мән-жайды анықтау үшін қызметтік тексеріс жүргізді. Кейін Семейде білім бөлімінің басшысы қызметінен қуылды. 

Қызметтік тексерістен кейін, шыршаны безендіруге үш мектептен 3 мұғалім тартылғаны анықталған. Бұған жол берген мектеп  директорлары тәртіптік жауапкершілікке тартылды.