Шерзат ісі бойынша сот наурызда басталуы мүмкін

Шерзаттың ісі бойынша сот наурыз айында басталуы мүмкін,  деп хабарлайды Bugin.kz порталы.  

Бұл туралы адвокат Саида Тәуекелова мәлімдеді. Қазір айыптаушы тарап істің мән-жайын зерттеп жатыр. 

“Іс зерттеліп болғаннан кейін сот уақыты белгілі болады. Менің болжамым бойынша, бұл наурызға дейін созылуы мүмкін. Тіпті ортасында басталса да игі. Өйткені бізде қылмыстық іске қатысы барлар көп”, – деді Саида.

Бұған дейін, облыстық полиция департаменті Шерзаттың әкесі Қаржаубай Нұрымовқа бөтеннің мүлкін қасақана бүлдіру фактісі бойынша қылмыстық іс қозғалғанын мәлімдеген болатын.  

“10 желтоқсанда Еңбекшіқазақ ауданы Азат ауылында болған заңсыз әрекеттер салдарынан көлік иесіне материалдық шығын келтірілгені анықталды. Бұл әкімшілік жауапкершілік шегінен айтарлықтай асып, қылмыстық сипаттағы іс ретінде бағаланды”, - деп жазылған департамент хабарламасында.

Талғарда болған кісі өлімі фактісі бойынша қылмыстық істен бөлек тағы да 8 қылмыстық іс тірелген. Сол үшін тергеу жұмыстары кешігіп жатқан көрінеді. 

"Құқық бұзушылық, бұзақылық, қоқан-лоққы көрсету және қылмыс туралы хабарламау фактілері бойынша қосымша 8 қылмыстық іс тіркелді. Іс бойынша 11 адамға қатысты "қамауға алу" түріндегі бұлтартпау шарасы қолданылды. Қазіргі уақытта сотқа дейінгі тергеу жүргізілуде, оның нәтижесінде процестік шешім қабылданады", - деп жауап берді ішкі істер министрлігі.

Айта кетейік, 2024 жылдың 4 қазанында Талғарда 16 жастағы Шерзат Полат кісі қолынан қаза тапқан еді.