Павлодарда оқушыға бұранда тығып алған мұғалім қызметіне қайта оралды

Тақтада есеп шығарып тұрған оқушыға бұранда тығып алған мұғалім қызметіне қайта оралды, деп хабарлайды Bugin.kz. 

Павлодар облысы білім басқармасының мәліметінше, математика пәнінің мұғалімі қызметтік тексеруге дейін жұмысын жалғастырады. 

“Білім бөлімі жүргізген қосымша бағалау негізінде, Еңбек кодексін және педагогикалық ұжымның қызметін реттейтін басқа да актілерді басшылыққа ала отырып, қызметтік тергеуге дейін мұғалімді орнында қалдыру туралы шешім қабылданды. Білім бөлімінің мамандары мектеп әкімшілігімен бірлесіп, жан-жақты тексеру жүргізіп, мұғалімнің әрекетіне құқықтық баға береді”, - деп мәлімдеді білім басқармасы.

Ведомствоның мәліметінше, оқушы мен оның ата-анасына психологиялық және әлеуметтік қолдау көрсетіледі. Тергеу жұмыстары жалғасып жатыр. Мұғалімнің жұмыста қалу, қалмауы тергеу жұмыстары аяқталғаннан кейін белгілі болады. Ал оған дейін мұғалім қызметін жалғастырады. 

Еске салайық, бұған дейін Павлодарда мұғалім тақтада тұрған оқушыға бұранда тығып, жұмыстан қуылғанын хабарлаған едік.