Қарағанды облысында 5,3 млрд теңгеге жуық заңбұзушылық анықталды: бюджет ақшасы қайда кеткен?

Қарағанды облысында жүргізілген аудит барысында жергілікті атқарушы органдар мен квазимемлекеттік сектордың бірқатар субъектілерінде 5,3 млрд теңгеге жуық қаржылық заңбұзушылықтар анықталды. Бұл туралы ҚР Жоғары аудиторлық палатасының баспасөз қызметі мәлімдеді, деп хабарлайды Bugin.kz порталы.

“ҚР Жоғары аудиторлық палатасының тапсырмасымен Қарағанды облысы бойынша тексеру комиссиясы жергілікті атқарушы органдардың (ЖАО) және квазимемлекеттік сектор субъектілерінің қарыздарын басқару тиімділігіне аудит жүргізді. Нәтижесінде заң бұзушылықтар сомасы 5,3 млрд теңгеге жуықтады”, – делінген ресми хабарламада.

Өңір қарызы екі есе өскен

Аудит барысында соңғы бес жылда Қарағанды облысының қарыздық жүктемесі 2,2 есеге артқаны, ал қарызға қызмет көрсету шығындары 1,5 есеге ұлғайғаны анықталды. Әсіресе, пандемия кезінде мемлекеттік бағалы қағаздардың шектен тыс шығарылғаны белгілі болды. 2020 жылы өңірдегі қарыз лимиті 3,8 млрд теңгеге асып кеткен.

“Қазіргі уақытта қарыз құрылымында оң өзгерістер байқалғанымен, оның бюджетке ең ауыр салмағы 2031 жылы түседі. Дәл сол жылы 20 келісімшарт бойынша 21,7 млрд теңге көлемінде қарызды өтеу қажет. Ал 2024 жылдың 1 қаңтарындағы негізгі қарыздың **60,4%-ы 2030-2043 жылдар аралығында өтелуге тиіс”, – деп мәлімдеді Жоғары аудиторлық палата өкілдері.

Қаржы бұзушылықтары қай салаларда анықталды?

Аудит барысында мына мекемелер мен басқармалар тексерілді:
    •    Қарағанды облысының қаржы, экономика, энергетика және тұрғын үй-коммуналдық шаруашылығы басқармалары
    •    “Қарағанды Су” ЖШС
    •    “Теплотранзит Қарағанды” ЖШС
    •    “Тұрғын үй қорының жаңғырту орталығы” ЖШС
    •    “ФК Шахтер” АҚ
    •    Қарағанды қаласының ТКШ, жолаушылар көлігі және автомобиль жолдары бөлімі

Аудиторлар мемлекеттік органдардың сыртқы және ішкі қарыздарды бақылаудағы формалды тәсілін сынға алды.
    •    “Теплотранзит Қарағанды” ЖШС жылдар бойы шығынға ұшырап келеді. Компанияның қаржылық жағдайы қиындап, несие міндеттемелерін орындау қаупі артқан.
    •    “Қарағанды Су” ЖШС бюджеттен несие ала отырып, таза пайдасын қатысушылар арасында бөлген. Сонымен қатар, бос қаражатты банктік депозиттерге орналастыру фактілері анықталды.
    •    “ФК Шахтер” АҚ-да тиімсіз қаржылық басқару салдарынан жүйелі түрде қарыз көлемі артқан. Клубтың жалақы, салық және басқа да міндетті төлемдер бойынша берешегі жинақталған.

Аудит қорытындысы

Тексеру нәтижесінде Қарағанды облысы бойынша тексеру комиссиясы анықталған заңбұзушылықтарды жою туралы ұсыныстар әзірлеп, тиісті мекемелерге нақты нұсқамалар берді. Қаржы тәртібін күшейту және бюджет қаражатын тиімді пайдалану мақсатында бірқатар шаралар қолға алынатын болады.