Әйел әлеуметтік желі арқылы талайды тақырға отырғызды

Қазақстандық әйел WhatsApp мессенджері арқылы қаржы пирамидасын ұйымдастырып, 23 жәбірленушіге 26 миллион теңгеден астам материалдық шығын келтірілді, деп хабарлайды Bugin.kz порталы.

Жоғарғы соттың мәліметінше, 2020 жылдың аяғында әйел WhatsApp-та "LiveStyler", "Қарлығаш", "Умножайка", "Шанс" және т.б топтарын құрады. Кейін ол адамдарды пайда табу үшін ақша салуға шақырған.

Топқа қатысушылар оның ықпалымен және жобалардың сәтті болатынына көз жеткізіп, өздерінің қаражаттарын әйелдің және оның туыстарының банктік шоттарына аударған. Ол өзі құрған схеманың табыстылығының көрінісін жасау үшін қатысушыларға жаңа қатысушылар есебінен дивидендтер түрінде алынған қаражаттың бір бөлігін төлеген. Қалғанын жеке қажеттіліктеріне жұмсаған.

"Осылайша, ақшасын көбейтемін деген уәдеге сеніп, жәбірленушілердің бірі LiveStyler тобына қосылған. Ұйымдастырушының қылмыстық ниетінен бейхабар ол 2021 жылдың қаңтар-қараша айлары аралығында алаяқ көрсеткен есепшотқа 14 миллион теңгеге жуық ақша аударған", - делінген хабарламада.

Осы соманың 8,5 миллион теңгесін алаяқ жәбірленушіге адалдық таныту үшін қайтарып берген. Қалған 5,4 миллион теңгені ол пайдакүнемдікпен иемденген.

"Қылмыстық әрекеттер нәтижесінде 23 жәбірленушіге 26 миллион теңгеден астам материалдық шығын келтірілген. Сотталушыға 4 жылға бас бостандығынан шектеу жазасын тағайындады", - делінген хабарламада.

23 жәбірленушінің пайдасына 26 милион теңге материалдық шығын өндірілді.