АҚШ, Ресей және Украина өкілдері Сауд Арабиясына барды

АҚШ делегациясы кеше, 16 ақпан күні Ресей өкілдерімен келіссөздер жүргізу үшін Сауд Арабиясына барды. Сонымен қатан Украина президенті де БАӘ-де екені айтылуда, деп хабарлайды Bugin.kz порталы. 

Бұл туралы АҚШ президентінің Таяу Шығыс жөніндегі арнайы өкілі Стив Уиткофф айтты. 

“Мен бүгін ұлттық қауіпсіздік жөніндегі кеңесшімен бірге сол жаққа аттанамын. Бізде президенттің тапсырмасымен кездесулер өтеді. Ресей мен Украина мәселесіне қатысты жақсы прогреске қолжеткіземіз деп үміттенемін”, – деді Уиткофф.

Сондай-ақ Украинаның экономика министрі Юлия Свириденко украиналық үкіметтік делегацияның Сауд Арабиясында жұмысын бастағанын және Владимир Зеленский сапарға дайындалып жатқанын хабарлады.

Оның айтуынша, украиналық делегация энергетика, ауыл шаруашылығы және инфрақұрылым салаларындағы бастамаларды, сондай-ақ инвестициялық жобаларды талқылаған.

Ал 14 ақпанда Зеленский алдағы күндері Біріккен Араб Әмірліктеріне, Сауд Арабиясына және Түркияға баратынын хабарлады. 16 ақпан, жексенбіде Украина президенті жұбайымен бірге БАӘ-ге барған.

Алдын ала мәлімет бойынша, Ресей мен АҚШ-тың Украина бойынша келіссөздері 18 ақпан, сейсенбіде Эр-Риядта өтеді.