Қазақстанда сотталған әйелдерге рақымшылық жасалуы мүмкін – IIМ

Ішкі істер министрлігі (ІІМ) сотталған әйелдерге рақымшылық жасау мәселесі бойынша депутаттық сауалға жауап берді, деп хабарлайды Bugin.kz порталы.

Ведомствоның мәліметінше, бүгінде 6399 әйел қылмыстық құқық бұзушылық үшін жазасын өтеп жатыр. Олардың 2692-сі бас бостандығынан айыру орындарында отырса, 3707-сі пробациялық бақылауда.

ІІМ-нің мәліметінше, Қазақстан Республикасы Қылмыстық кодексінің 78-бабына сәйкес, 1220 әйел ауырлығы аз және орташа деңгейдегі қылмыстары үшін жазадан босатылуы мүмкін. Сондай-ақ, зорлық-зомбылыққа қатысы жоқ қылмыстар бойынша 2002 әйел сотталған, олардың 1766-сы алғаш рет заң бұзған, ал 150-і – ауырлығы аз және орташа деңгейдегі қылмыстар жасаған.

Қандай өзгерістер болуы мүмкін?

Ауыр және аса ауыр қылмыстар жасаған 5055 әйелдің жаза мерзімі қысқартылуы мүмкін. Сонымен қатар, рақымшылық беру кезінде тек қылмыстың ауырлығы ғана емес, сотталғандардың әлеуметтік жағдайы да ескерілмек. Осы санатқа жататындар:

29 мүгедек әйел (I топ – 3, II топ – 3, III топ – 15);

60 жастан асқан 243 әйел;

Жүкті 13 әйел және үш жасқа дейінгі баласы бар 58 ана;

226 көпбалалы ана.

Сонымен қатар, 3910 әйел үшін бас бостандығынан айыру жазасын неғұрлым жеңіл жаза түріне ауыстыру мәселесі қарастырылуы мүмкін. Алайда, ІІМ Конституцияның 14-бабына сәйкес, заң алдында барлық азамат тең екенін және жыныстық белгісі бойынша ешкімді кемсітуге болмайтынын ескеруді ұсынады.

Ерлерге қатысты рақымшылық қарастырыла ма?

Әлеуметтік осал топтарға жататын 920 сотталған ер адам бар. Бұл санатқа I және II топтағы мүгедектер, мүгедек балаларды тәрбиелеп отырған әкелер, Ұлы Отан соғысына қатысушылар, зейнеткерлер мен толық емес отбасылар кіреді. Сонымен қатар, алғаш рет сотталған және зорлық-зомбылықсыз қылмыс жасаған ер азаматтарды босату мүмкіндігі де қосымша талдауды қажет етеді.

Бюджетке әсері

ІІМ сотталғандарға рақымшылық беру арқылы мемлекеттік бюджет шығындарын азайтуға болатынын мәлімдеді. Егер 2000-нан астам сотталған босатылса, бюджет күніне 5,8 млн теңгеге дейін үнемдейді. Қазіргі таңда бір сотталғанды ұстауға күніне 2900 теңге, ал жылына 2,1 млрд теңге жұмсалады.

Бұл шара гуманизм қағидаттарын қолдау, мемлекеттің әлеуметтік саясатын жүзеге асыру, әйелдердің қоғамға бейімделуіне көмектесу, отбасылық құндылықтарды нығайту, балалардың құқықтарын қорғау, сондай-ақ қылмыстық-атқару жүйесі мекемелерінің жүктемесін азайту мақсатында қарастырылып отыр.