Абай атындағы ҚазҰПУ-дың оқу корпустары мен стадионы қайтарылды

Абай атындағы ҚазҰПУ ұлттық университетіне оқу корпустары мен стадионы қайтарылды, деп хабарлайды Bugin.kz порталы. 

Медеу ауданының прокуратурасыеың мәліметінше, университеттің бұрынғы басшылығы оқу және тұрғын үй алаңының жетіспеушілігіне қарамастан, сауда-саттықты өткізбей және бағалаусыз жалпы ауданы 1500 шаршы метрден астам екі оқу корпусын жеке тұлғаларға заңсыз сатып жіберген. 

Ғимараттардың бірі бірнеше жыл бойы университеттің өзіне жалға берілсе, ал екіншісінде ойын-сауық мекемесі ұйымдастырылған. Сонымен қатар алаңы 5 гектардан асатын спорт стадионы 10 жылға үшінші тұлғаларға берілген.

“5 жыл бойы футбол алаңы коммерциялық мақсатта пайдаланылған. Ал 16 мың студенттің дене шынықтырумен толық айналысуға және спорттық іс-шаралар өткізуге мүмкіндігі болмаған”, - деп хабарлады бас прокуратура.

Медеу ауданы прокуратурасының қадағалау актілері бойынша заңды күшіне енген сот шешімдерімен, мүлік объектілері ұлттық университетке қайтарылды.