Ербаян Мұхтардың ісі: бір жыл бойы күдіктілер анықталмаған

Бас әскери прокурордың бірінші орынбасары Мақсат Қазиев әскерден сал болып келген Ербаян Мұхтардың ісіне қатысты сұрақтарға жауап берді, деп хабарлайды Bugin.kz порталы. 

Мақсат Қазиевтың айтуынша, қазір кешенді жедел-тергеу шаралары жүргізіліп жатыр екен. Сараптамалар мен тергеу нәтижелерін алғаннан кейін шешім қабылданады.

"Әскери қызметші Мұхтар Ербаянның ауыр жарақат алуына байланысты жедел-тергеу іс-шаралары кешені жүргізіліп, сараптамалар тағайындалды. Сараптамалар қорытындысын және тергеу нәтижелерін алу бойынша барлық жиналған дәлелдемелер мен нақты деректердің жиынтығы бойынша шешім қабылданады. Бүгінгі таңда біз ҚІЖК 201-бабына сәйкес тергеу нәтижелеріне түсініктеме бере алмаймыз, өйткені іс көптеген адамдардың мүдделерін қозғайды", - деді ол.

Шенеунік тергеу күдікті адамдарды әлі анықтаған жоқ деп мәлімдеді.

Еске салайық, Ербаян Мұхтар ұлттық ұланның Алматы қаласындағы 5571 әскери бөлімінде әскери борышын өтеп жүріп, 2023 жылдың желтоқсанында ауыр ми жарақатын алды. Салдарынан сарбаз комаға түсті. Әскери бөлім басшылығы сарбаздың туыстарына Ербаянның дәретханада құлап, басын еденге соғып алғанын айтқан. Алайда сарбаздың жақындары ұлдарының абайсызда құлағанына сенбейді. Ішкі істер министрлігі тергеу барысын өз бақылауына алды. Қазақстандықтар Ербаянның емі үшін 230 млн теңге жинап берді. Қыркүйектің соңында сарбаз Түркияға ем алуға кеткен болатын.