Қатарласын өлтірген мектеп оқушылары заң алдында жауап береді

Қопа ауылында жасөспірімнің өлімі бойынша іс сотқа жолданды, деп хабарлайды Bugin.kz порталы. 

Облыс прокуратурасымен Ақтөбе облысының кәмелетке толмағандардың істері жөніндегі мамандандырылған ауданаралық сотына Темір ауданының Қопа ауылында мектеп оқушысының абайсызда өліміне әкелген қылмыстық іс қаралып жатыр. 

Іс облыстық полиция департаментімен тергеліп, процестік прокурор тағайындалды. 

Тергеу мәліметіне сүйенсек, өткен жылдың 2 қыркүйегінде Темір ауданының Қопа ауылында 10-сынып оқушылары 11-сынып оқушыларының нұсқауымен 9-сынып оқушыларын “тәрбиелік мақсатта” ұрып-соққан.

Салдарынан кәмелетке толмаған Сыдық Н. ауыр дене жарақаттарынан көз жұмды.

Тергеу барысында 6 кәмелетке толмаған күдікті қамауға алынды. Олардың біреуі ҚР ҚК 106-бабының 3-бөлігімен (Абайсызда жәбірленушінің өліміне әкелген қасақана ауыр дене жарақатын келтіру) бойынша сотқа берілді. Ал қалған бесеуі ҚР ҚК 293-бабының 2-бөлігі (Бұзақылық) және 106-бабы 3-бөлігінде көзделген қылмысты жасауды ұйымдастырғаны (Қылмысты ұйымдастыру, ҚР ҚК 28-бабы 3-бөлігі) үшін жауапқа тартылып жатыр.