Семейдегі шулы оқиға: мектеп директоры жұмыстан қуылды

Семейде жасөспірімдердің 6-сынып оқушысын ұрып-соққан жағдайдан кейін  №9 мектептің директоры қызметінен босатылды, деп хабарлайды Bugin.kz порталы. 

Абай облысының білім басқармасының мәліметі бойынша, мектептің тәрбие ісі жөніндегі орынбасарына қатаң ескерту жасалды. Сондай-ақ, шабуыл жасаған оқушылар оқитын мектептердің директор орынбасарлары да жазаланды. №15 мектеп директоры мен Уәлиханов атындағы “Жас Ұлан” лицей-интернатының директоры да ескерту алды.

Қазіргі таңда полиция тергеу жүргізіп жатыр, ал балалар құқықтарын қорғау комиссиясы ұрып-соғуға қатысы бар төрт жасөспірімді арнайы мектепке жіберу туралы шешім қабылдады. Құқық бұзушылардың ата-аналары әкімшілік немесе қылмыстық жауапкершілікке тартылуы мүмкін.

Абай облысының су жаңа әкімі Берік Уәли ненеуніктердің, полиция мен прокуратура өкілдерінің, сондай-ақ балалар омбудсменінің қатысуымен кеңес өткізді. Ол жауапты тұлғаларға тәртіптік шара қолдану керегін айтты.

“Аймақтың барлық мектептерін қатаң бақылауда ұстау керек. Білім басқармасы құқық қорғау органдарымен бірлесіп оқушылармен және олардың ата-аналарымен жүйелі түрде түсіндіру жұмыстарын жүргізуі қажет. Облыстың оқу орындары үшін тәуекелдер картасы, сондай – ақ мұндай жағдайларда жедел әрекет етудің нақты алгоритмі әзірленуі тиіс”, - деп міндеттеді Берік Уәли.

 

Еске салайық, әлеуметтік желіде бір топ жасөспірім мектеп оқушысын соққыға жыққан видео тарады. Жәбірленуші 6-сынып оқушысы екен.  
Бұзақылар оқушының басынан, кеуде тұсынан тоқтаусыз тепкілеген. Қазір бұл оқиға бойынша қылмыстық іс қозғалды. Тәртіп бұзған балалардың ата-аналары полицияға жеткізілді. Жасөспірімдер арнайы есепке қойылып, олардың тәртібін кәмелетке толмағандар құқығын қорғау жөніндегі комиссия қарайды.