Мемлекет басшысы Ұлттық Құрылтайда қандай мәселе көтерді?

Қасым-Жомарт Тоқаевтың қатысуымен Бурабайда Ұлттық құрылтайдың IV отырысы басталды. Жиынға Құрылтай мүшелері мен басқа да делегаттар қатысып оты. Мұнда Мемлекет басшысы елдің саяси жүйесін жаңғырту, жалпыұлттық бірлікті нығайту және реформалардың мән-маңызын халыққа түсіндіру мәселелеріне тоқталды, деп хабарлайды Bugin.kz порталы.

Үш жылдық реформалар және өзгерістер

Президент елде соңғы үш жыл ішінде жүзеге асқан реформаларға тоқталды. Ол 2022 жылы жарияланған Жолдауда Ұлттық құрылтай құру бастамасы көтерілгенін еске салып, осы уақыт ішінде Қазақстан жаңа тұрпатты мемлекетке айналғанын айтты.

«Үш жылдың ішінде Қазақстан жаңа тұрпатты ел болды. Саяси реформалар жан-жақты өзгерістер жасауға мүмкіндік берді. Жалпыхалықтық референдум арқылы Ата заңға түзетулер енгізілді. Парламенттің құзыры кеңейді, Үкіметтің жауапкершілігі артты. Адам құқықтарын қорғау жүйесі жақсарды. Конституциялық сот құрылды. Шешім қабылдау үдерісіне азаматтардың белсене қатысуына жол ашылды. Басқа да бағыттарда маңызды реформалар жасалды», – деді ол.

Жергілікті билікті жаңғырту

Президент соңғы үш жылда жергілікті билік құрылымында да түбегейлі өзгерістер орын алғанын айтты.

«Үш жылдан астам уақыт ішінде ауыл әкімдерінің 72 пайызы жаңарды. Оның үштен бірі – бұрын мемлекеттік қызметте болмаған азаматтар. Бір сөзбен айтсақ, аймақтардағы атқарушы билікке жаңа адамдар келіп жатыр.

Пилоттық жоба ретінде аудандар мен облыстық маңызы бар қалалардың 45 әкімі сайланды. Биылдан бастап барлық аудан әкімдерін халық тікелей сайлайтын болады. Түрлі деңгейдегі мәслихат сайлауы өкілді билік органдарының жұмысына тың серпін берді. Облыстық және аудандық мәслихат депутаттарының 90 пайызы бір мандатты округтен, яғни тікелей дауыс беру арқылы сайланды. Билік жүйесінде мұндай ауқымды өзгеріс бұрын-соңды болмады», – деді ол.

Салық реформасы – әділ жүйені қалыптастыру

Президент қазіргі уақытта қоғамда қызу талқыланып жатқан салық реформасына қатысты пікірін білдірді. Мемлекет басшысының айтуынша, салық жүйесі – бүкіл мемлекеттік жүйенің тірегі.

«Бюджетте қаржы болмаса, мемлекет өз міндетін толық атқара алмайды, әлеуметтік міндеттемелер де орындалмайды. Бұл туралы жаңа ғана белгілі экономист Жақсыбек Құлекеев жақсы айтып өтті. Сондай-ақ Құрылтай мүшелері Қайырбек Арыстанбеков, Марат Башимов, Ерлан Саиров, Расул Рысмамбетов және Мұрат Әбенов салық-бюджет мәселесіне қатысты орынды пікір білдірді.

Еліміз үшін аса қажет шаралардың мән-маңызын халыққа егжей-тегжейлі түсіндіру керек. Жұрттың бәрі экономист немесе қаржыгер емес. Мемлекеттің қандай шараны не үшін қолға алып жатқанын бәрі бірдей түсіне бермеуі мүмкін. Сондықтан реформаның мәнін адамға түсінікті тілмен жеткізу керек»,  – деп жеткізді ол.

Бірыңғай уақыт белдеуіне көшу

Президент елде бірыңғай уақыт белдеуіне көшуге қатысты пікірталасқа да тоқталды.

«Үкімет пен Парламент бұл мәселені талқылады. Арнайы зерттеулер жүргізілді, шешімге күмән келтірген қоғам белсенділерінің қаупі мен күмән-күдігі расталған жоқ.

Үкіметтің және депутаттардың басым көпшілігінің, сондай-ақ мамандардың уәжімен келісемін: біздің кең-байтақ жеріміз бар, халқымыздың саны да салыстырмалы түрде алғанда көп емес. Сондықтан елімізде бірыңғай уақыт белдеуі болуға тиіс. Бұл тәсіл мемлекетті басқару ісін жеңілдетеді, логистика мен көптеген бизнес-үдерісті оңтайландыруға септігін тигізеді. Осымен пікірталасты доғару қажет деп ойлаймын, оның үстіне бұл мәселені саясиландырудың қажеті жоқ», –  деп қосты ол.