АҚШ-та тұратын танымал боксшы қазақстандық мектептен қалай жалақы алып отыр?

АҚШ-та тұратын қазақстандық боксшы Данияр Елеусінов Қазақстанда жалақы алатын "өлі жандардың" тізімінде. Бұл туралы журналист Михаил Козачков Telegram арнасында мәлімдеді, деп хабарлайды Bugin.kz порталы Stan.kz сайтына сілтеме жасап.

"Қазақстанға танымал боксшылардың бірі, қазір проф. рингте өнер көрсетіп жүрген Олимпиада чемпионы Данияр Елеусінов 2016 жылы Олимпиадаға қатысып, содан кейін кәсіпқой боксқа ауысты. Ол бірнеше рет жекпе-жек өткізгенімен қарсыластарын беделді деп айтуға келмейді. 

Сонымен қатар Елеусінов бар уақытын АҚШ-та өткізеді. Боксшы Instagram парақшасында Флорида, Манхэттен және Американың басқа да әсем жерлерінен фотолар жариялайды. Осыған қарап оны АҚШ-та тұрақты түрде өмір сүреді деп болжауға болады. Бірақ ол Астана қаласындағы №3 "Олимпиадалық резервтегі мамандандырылған балалар мен жасөспірімдерге арналған спорт мектебінде" балаларды қалай оқытып жүр. Тіпті оның мектептен зейнетақы жарналары бар. Ал спортшының өзі шетелде", - деп жазды журналист.

Сондай-ақ ол Валентина Хальзова мен Марина Вольнованың да №3 "Олимпиадалық резервтегі мамандандырылған балалар мен жасөспірімдерге арналған спорт мектебінде" тізімде тұрғанын айтты. Журналист олардың өздері тіркелген спорт мектебінде тікелей міндеттерін атқаратынына күмән келтіретінін айтады.

"Сондықтан мен құқық қорғау органдарынан боксшылардың жұмысқа қалай орналасқанын, шын мәнінде сабақ жүргізетінін, жұмыс күндерінің қалай белгіленгенін анықтауын сұраймын. Олар спорт мектебінен түсетін ақшаны өздеріне ала ма, әлде біреудің картасына аударыла ма? Жалпы, мұндай жағдай тек №3 "Олимпиадалық резервтегі мамандандырылған балалар мен жасөспірімдерге арналған спорт мектебінде" ғана қалыптасқан ба, әлде Астанадағы басқа спорт мекемелерінде де бар ма? Нақты білгім келеді. 

Өйткені, елорда спортында оғаш оқиғалардың көптеп орын алатыны жасырын емес. Мәселен, "Спортты олимпиадалық түрлері бойынша дамыту дирекциясы" КММ-де спортшылардың іссапардағы сапарларынан қайтарым алған бірінші басшы қамауға алынды. Қазір бұл шенеуніктің ұрлық және пара алу фактілері бойынша тергеу жүріп жатыр. Менің білуімше, жақын арада қылмыстық іс сотқа жолданады", - деп жалғады журналист.

Козачковтың айтуынша, егер басқарма басшысы кінәлі деп танылса, Астана қалалық спорт басқармасының басшысы Самат Жылқыбаев жауапкершілікке тартылуы керек.

"Егер қарамағындағы қызметкер сыбайлас жемқорлықпен ұсталса, оның басшысы қызметінен кетуі керек. Бұл - заң. Астанадағы барлық спорт нысандарына тексеріс жүргізген жөн. Тексерісті боксшы Елеусіновтен бастау керек", - деді Козачков.

Журналист Михаил Козачков келтірген мәліметке Астана қаласы әкімдігінің "№3  Олимпиадалық резервтегі мамандандырылған балалар мен жасөспірімдерге арналған спорт мектебі" КММ басшысы Мұрат Ыбырайұлы жауап берді.

Оның айтуынша, Елеусінов Данияр Маратұлы Астана қаласы әкімдігінің №3 "Олимпиадалық резервтегі мамандандырылған балалар мен жасөспірімдерге арналған спорт мектебі" КММ-де жаттықтырушы болып жарты күн жұмыс істейді. Жалақы сомасы – 80 249 теңге. 

ҚР Еңбек кодексінің 138-бабына сәйкес жұмыс берушілерге ұйымдық-құқықтық нысанына қарамастан өз қызметкерлері үшін еңбек қызметінің қашықтағы нысанын белгілеуге рұқсат етіледі.

"Дене шынықтыру және спорт ұйымдары түрлерінің тізбесін және олардың қызметі қағидаларын бекіту туралы" ҚР Мәдениет және спорт министрінің 2014 жылғы 22 қарашадағы №106 бұйрығының 27-тармағына сәйкес, оқу-жаттығу топтарындағы, спорттық жетілдіру және жоғары спорттық шеберлік топтарындағы сабақтарды спорт бойынша бас жаттықтырушы-оқытушы жүргізеді. Бұл ретте оқу процесіне көмек көрсету үшін қосымша жаттықтырушы-мұғалім тартылады. Дәл осындай қашықтан жұмыс істейтін көмекші жаттықтырушы-мұғалім Данияр Маратұлы.

Бұл жергілікті бокс мектебінде тарихи қалыптасқан жұмыс түрі, яғни барлық чемпиондарды әдістемелік жұмысқа тарту маңызды. Хальзова Валентина мен Марина Вольнова да дәл осындай жағдайда жұмыс істейді. 

Айта кетейік, заңнаманы нормативтік реттеудің жалпы бағытына байланысты, әлеуметтік қамсыздандыруды шоғырландыру үшін спортшы өз мансабының соңына дейін 20 жылдық еңбек өтілін алуы қажет" - деп жауап берді  "№3  Олимпиадалық резервтегі мамандандырылған балалар мен жасөспірімдерге арналған спорт мектебі" КММ басшысы Мұрат Ыбырайұлы.

Қазақстандық танымал спортшы кәсіпқой бокстағы әлем чемпионы атағынан айырылды

Данияр Елеусінов Серік Сәпиев пен балуан арасындағы жанжалға пікір білдірді