Баланы тұншықтырған тәрбиеші: Балабақша басшысы мәлімдеме жасады

Алматыда басы дауға қалған “Ахляк” балабақшасы жұмысын уақытша тоқтатты, деп хабарлайды Bugin.kz порталы. 

Еске салайық, өткен аптада тәрбиешінің баланы тұншықтырғаны қоғамды дүр сілкінткен еді. 4 жасар баланы тұншықтырды деп айыпталған тәрбиеші жұмыстан қуылып, орталық директорына айыппұл салынған. 

Бүгін кәсіп иесі Амина Юсупбаева халықтан кешірім сұрап, әлеуметтік желіге бейнежазба жариялады. 

Ол қызметкерінің әрекетін қолдамайтынын айтып, тергеу жұмыстарына көмектесетінін жеткізген.

Балабақша қожайыны Амина Юсупбаева тергеу басталғаннан кейін әлеуметтік желідегі барлық аккаунттарын жауып, тек өзіне оң пікірлер қалдыруға болатын бір парақшаны ғана ашық қалдырған.

“Тергеу барысында барлық аккаунттарымды жабуға тура келді. Айтар сөзім жоқ болғандықтан үнсіз отырған жоқпын, жай ғана алгоритмдер іске қосылып, ақпараттық қысым басталғанын көріп тұрмын. Қазір әр сөзім бұрмаланып жатыр”, – деп жазды ол.